Комиссиялық алымды енгізу – жолаушылар тасымалы қызметтерінің сапасын арттыруға бағытталған әлемдік тәжірибе

«Жолаушылар тасымалы» АҚ теміржол билеттерін рәсімдеу мен қайтару кезінде комиссиялық алым енгізілетінін хабарлайды. Бұл тәжірибе әлемнің көптеген елдерінде бұрыннан қолданылып келеді және ол заманауи сервистерді дамытуға, жолаушыларға көрсетілетін қызметтің қолайлылығын арттыруға негізделген.

2025 жылғы қазан айынан бастап билет сатып алу кезінде жолақыға 0,06 АЕК (2025 жылға - 236 теңге) көлемінде комиссиялық алым қосылады, ал билетті қайтарған жағдайда 0,1 АЕК (2025 жылға - 393 теңге) мөлшерінде алым ұсталады.

Комиссиялық алымды енгізу келесі мүмкіндіктерге жол ашады:

• Жолаушылар тасымалы саласында цифрландыру мен автоматтандыруды ілгерілету, соның ішінде Ұлттық жолаушылар тасымалын басқару жүйесін енгізу көзделіп отыр. Бұл бастама барлық үдерістердің ашықтығын арттырып, жолаушылар үшін қызмет көрсетуді қолайлы әрі тиімді етеді.
• Дәстүрлі кассалардан бастап онлайн-платформаларға дейінгі билеттерді сату және қайтару сервистерін дамыту, олардың үздіксіз әрі сенімді жұмысын қамтамасыз ету.
• Билеттерді көптеп сатып алып, кейін жаппай қайтару арқылы орын тапшылығын жасанды түрде туындату әрекеттерін болдырмау және жолаушыларға қолайлы жағдай қалыптастыру.

Айта кетейік, қолданыстағы тарифтер мен мемлекеттік субсидиялар ақпараттық технологиялар жүйелері мен кассалық сервистерді қолдауға жұмсалатын қомақты шығындарды толық өтей алмайды. Комиссиялық алым енгізу жүйенің үздіксіз жұмысын қамтамасыз етіп қана қоймай, сервистің әрі қарай дамуына жол ашады.

Ұлттық тасымалдаушы теміржол көлігіндегі сапарды ыңғайлы, қауіпсіз әрі қолжетімді етуге бағытталған жұмыстарын жалғастырып келеді. Компания әрқашан ашық диалогқа дайын және жолаушыларға енгізілетін барлық өзгерістер туралы толыққанды ақпарат беруге әзір.

«Жолаушылар тасымалы» АҚ баспасөз қызметі